Dende a subdirección xeral de persoal da Administración de Xustiza indicóusenos que, durante a primeira quincena deste mes de febreiro, porase en marcha un novo módulo da aplicación informática de Xustiza que permitirá a creación, xestión e presentación electrónica de solicitudes de permisos e vacacións. Esta nova opción permite eliminar o uso do papel no total da tramitación destas peticións, sendo electrónica tanto a sinatura como a presentación en todos os seus trámites. Para poder cursar as peticións electronicamente, é preciso posuir un certificado dixital admitido pola SEDE electrónica da Xunta de Galicia, que agora mesmo son o DNI electrónico ou un certificado dixital da FNMT. As solicitudes realizadas polos/as funcionarios/as, irán do buzón persoal ao do director funcional, e este será o encargado de remitilas ao xestor do servizo de Xustiza correspondente, sendo visible en todo momento o estado de tramitación de cada unha das peticións.
Polo momento e, mentres non se complete o reparto das novas tarxetas identificativas do persoal ao servizo da Administración de Xustiza, que levarán ademais incorporado un certificado dixital de empregado público, seguirán convivindo as dúas vías de solicitude, é dicir, a manual e a electrónica, pero na medida do posible, a Dirección Xeral solicita o emprego destas novas ferramentas, buscando ao mesmo tempo, unha maior familiarización de todos os usuarios co Portal do Empregado Público, posto que pouco a pouco se intentará que esta sexa a primeira canle de comunicación entre persoal e administración.
Cando a distribución das novas tarxetas se complete, informarase do fin da posibilidade de presentación manual deste tipo de solicitudes. Os servizos de Xustiza de cada unha das delegacións territoriais seguen a ser os competentes para a tramitación das solicitudes, e deberase remitir calquera dúbida sobre o funcionamento da nova ferramenta a estes.
Comentarios
Publicar un comentario