Esta fin de semana, concretamente o pasado sábado 20 de xaneiro, levouse a cabo a VII Asemblea Nacional do Sector de Xustiza, na que se deu conta das actuacións do sector nestes últimos anos e se analizaron as actuacions futuras, tanto a curto como a longo prazo, tendo en conta o escenario de confrontación e de perda de dereitos debidos á mala xestión da Xunta de Galiza e as vindeiras eleccións sindicais do ano 2019.
Nesta VII Asemblea de Xustiza saiu reelexido, como Secretario Nacional do Sector, Xesus H. Sánchez Costa (Tuto) e como membros da nova Dirección Nacional, Oscar Freixedo Beltrán, Eva Rodríguez Vicente, Delmiro Durán Garrido, Chelo Rodríguez Rodríguez, Xosé Barreiro Pérez, Antonio Ayaso Reiriz e Maria Carmen Bergantiños Vázquez.
O novo secretario nacional debullou polo miudo, nun informe que foi aprobado por unanimindade, as actuacións apoiadas polo sector, tanto ante a Xunta de Galiza como ante o Ministerio de Xustiza, salientando as grandes dificultades habidas no dialogo con PP nestes catro anos; partido que goberna tanto en Galiza como en Madrid, resultando, con diferencia e paradoxicamente, máis difíciles os contactos coa administración autonómica que coa central. En todo caso, o reelexido secretario nacional, afrónta esta nova etapa con ilusión, dada a incorporación de dous novos delegados que realizarán as súas funcións en Compostela e Ourense, Antonio Ayaso Reiriz e Manuela Mares Iglesias, que de seguro apuntalarán a acción sindical da CIG nesas vilas, dado o escenario de grandísima disgregación do voto sindical, ao existir en xustiza ata sete centrais sindicais que concorren aos procesos electorais, das cales varias son corporativistas.
A CIG comeza esta nova etapa pois, coa experiencia, seriedade e coherencia que lle dan todos estes anos de permanencia nas mesas sectoriais de Galiza e Madrid, defendendo os intereses de todas/os as traballadoras/es da Administración de Xustiza de Galiza.
Comentarios
Publicar un comentario