PREGUNTAS PARLAMENTARIAS DO BNG SOBRE MELLORAS DOS XULGADOS DE OURENSE E SOBRE O INCENDIO DOS ARQUIVOS DE FERROL

PREGUNTA PARLAMENTARIA DO BNG INSTANDO MELLORAS NOS XULGADOS DE OURENSE O deputado do BNG Iago Tabarés ven de se interesar polos prazos para a execución das obras de reforma do Pazo de Xustiza de Ourense, toda vez que se está a producir unha nova demora nos compromisos asumidos pola propia Directora de Xustiza nunha visita realizada hai uns meses ás instalacións do Pazo.

Tabarés rexistrou unha iniciativa parlamentar na que lembra que a solución a grande parte das eivas da administración de Xustiza na cidade pasa por un novo edificio no que xa se está a traballar, “mais isto no pode impedir de ningún xeito que, con carácter de urxencia, se dote a Ourense dos elementos mínimos para unha axeitada prestación dun servizo público básico como é a Xustiza”. O deputado nacionalista refírese, concretamente, a dependencias específicas para o xulgado de garda, o servizo de atención ás vítimas –nomeadamente ás de violencia de xénero- e medidas de seguranza e accesibilidade, entre outras. Trátase, segundo Tabarés, dunha serie de reivindicacións que xa foron postas de manifesto polo BNG en diferentes ocasións, facéndose eco das demandas da práctica totalidade dos operadores xurídicos, e que foron recoñecidas pola propia directora xeral, quen recoñeceu a escasa complexidade das obras mais sen que até o de agora se teña constancia dalgún avance ao respeito. Ante o exposto, o deputado do BNG pregunta polos prazos concretos para dotar ao Pazo de Xustiza actual de dependencias específicas para o xulgado de garda así como para racionalizar e acondicionar o espazo e as dependencias ubicadas no baixo andar. Asemade, Tabarés aproveita a iniciativa para coñecer o estado dos trámites para comezar o novo edificio xudicial. PREGUNTA SOBRE A SITUACION DOS ARQUIVOS XUDICIAIS E POLO INCENDIO DE FERROL O BNG quer coñecer as causas do incendio no Arquivo Xudicial de Ferrol e que se adopten medidas para mellorar a situación dos arquivos xudiciais de Galiza Iago Tabarés lembra que o BNG xa ten denunciado as condicións nas que se atopan moitos destes espazos, co conseguinte perxuízo para a documentación que albergan Santiago de Compostela, 31 Marzo 08. O grupo parlamentar do BNG, a través do seu deputado Iago Tabarés, ven de solicitar medidas para mellorar a situación dos arquivos xudiciais de Galiza e a organización dos mesmos, , “pois acontecementos como o vivido no arquivo de Ferrol deben levarnos a analizar o estado dos mesmos nos diferentes edificios xudiciais do País, así como a xestión que se está a facer da súa documentación”. Tabarés rexistrou unha iniciativa parlamentar na que tamén demanda a elaboración dun Plan de emerxencias para este tipo de continxencias, que permita evitar ou reducir as posibilidades de que se reproduzan feitos semellante e estableza cautelas para reducir ao mínimo as súas consecuencias. O parlamentar salienta que non haxa que lamentar danos persoais, xa que o lume se iniciou no baixo andar do inmóbel e neses momentos só estaba en servizo o xulgado de garda, “pero esta circunstancia non debe impedir, senón máis ben todo o contrario, facer unha análise rigurosa sobre a calidade do sistema de proteción existente na Administración de Xustiza perante este tipo de emerxencias”. Para Tabarés, acontecementos como o vivido en Ferrol debe levar tamén a unha reflexión sobre o estado dos arquivos nos diferentes edificios xudiciais e lembrou que o BNG xa ten denunciado en numerosas ocasións a existencia de arquivos, “por chamalos dalgún xeito”, con problemas de humidades, ratas, falla de espazo, limpeza e hixiene ou mesmo nos que a documentación xudicial non está protexida do acceso por persoas alleas á administración de Xustiza.