VIDEOCONFERENCIA CO MINISTERIO DE XUSTIZA

O MINISTERIO DE XUSTIZA ASUME A COORDINACIÓN DA ACTIVIDADE PROFESIONAL DOS MEMBROS DOS CORPOS DE FUNCIONARIOS EN TODO O TERRITORIO DO ESTADO

E MENTRES A DIRECCIÓN XERAL DE XUSTIZA DA XUNTA DE GALIZA SEGUE SEN TER COMUNICACIÓN NINGUNHA COS LEXÍTIMOS REPRESENTANTES DAS TRABALLADORAS E TRABALLADORES DA XUSTIZA GALEGA

 

No día de hoxe a CIG participou xunto ás outras cinco organizacións sindicais con representación na mesa sectorial (ELA, CCOO, CSIF, STAJ e UGT), nunha nova reunión por videoconferencia co Ministerio de Xustiza, mantendo así a canle de comunicación aberta o pasado luns para tratar a problemática en relación aos servizos mínimos e medidas de protección na administración de xustiza.

Fixemos chegar o malestar dos traballadores da xustiza galega pola que consideramos inxerencia do CXPX, segundo eles en aras ao mantemento do servizo público, en asuntos de persoal que non son da súa competencia. Si é da súa competencia decretar cales son os servizos esenciais, pero non o persoal necesario para atender eses servizos.

De igual forma trasladamos o que consideramos deixamento absoluto da Dirección Xeral de Xustiza da Xunta que segue sen ter comunicación algunha cos lexítimos representantes das traballadoras e traballadores da xustiza en Galiza dende que se decretou o Estado de Alarma e de Emerxencia Sanitaria no noso país.

Coa publicación hoxe no BOE da orde SND/261/2020, pola que se encomenda ao Ministro de Xustiza a coordinación da actividade profesional dos membros dos corpos de funcionarios regulados no libro VI da Lei Orgánica 6/1985, do 1 de xullo, do Poder Xudicial en todo o territorio do Estado, faise caso á nosa solicitude (dado o deixamento da Direc. Xeral de Xustiza) feita na reunión do pasado luns.

Propuxemos diversas medidas a tomar en relación aos servizos mínimos establecidos, que consideramos excesivos dado o descenso da actividade xudicial. Medidas encamiñadas a garantir tanto a saúde do persoal como o mantemento do servizo da xustiza.

Solicitamos que as OO.SS. como lexìtimos representantes d@s traballador@s, estean presentes na Comisión de coordinación da situación de crise prevista na orde publicada hoxe no BOE.

En canto as medidas de prevención, esiximos un protocolo de actuación para o persoal e centros de traballo afectados por contaxios, así como a dotación de material individual (EPIs) para o persoal que realiza os servizos mínimos, que se se reducen como solicitamos sería máis factible dotalos, dada a escaseza de material e as prioridades sanitarias.

Tamén solicitamos , que @s traballador@s de máis de 60 anos se consideren grupo de risco e por tanto non entren nas quendas de servizos mínimos e estean exentos de acudir ao traballo.

O Ministerio comunicou que estudiará todas as solicitudes das Centrais Sindicais (prioritariamente a dotación dos servizos mínimos e a adopción de medidas sanitarias) e lles dará resposta o antes posible. Entre hoxe e mañá publicará na web unha normativa específica sobre prevención.

Ve difícil que os Sindicatos poidamos estar con representación na Comisión de coordinación, pero si garantiu o contacto con nós e o traslado á Comisión das nosas propostas.

O Ministerio agradeceu a colaboración das OO.SS. e manifestou a súa intención de manter a canle de comunicación aberta, emprazándonos para o martes ou mércores para unha nova reunión por videoconferencia. 

 

Galiza 20 de marzo de 2020