Recentemente a Comunidade Autónoma Andaluza sacou a licitación un concurso de adxudicación dun servizo de cita previa para 24 Rexistros Civís da súa comunidade autónoma http://www.juntadeandalucia.es/presidencia/portavoz/gobiernoaldia/154730/Justicia/CitaPrevia/Internet/RegistroCivil. Pois ben, en Galiza a Xunta, tal e como nos comentou o Director Xeral de Xustiza na última xuntanza do Comité de Seguridade e Saúde Laboral, ofreceulle ao TSXG o servizo de cita previa que xa ten funcionando na actualidade e, os representantes xudiciais rexeitaron dita opción mantendo como única alternativa a atención telefónica. Ninguén se explica porque, se xa temos un sistema de cita previa posta a nosa disposición, nin tan sequera se fai unha experiencia piloto nalgunha vila das importantes para poñer en marcha ese servizo na administración de xustiza. Seguimos na prehistoria das consultas telefónicas, cando de todos é sabido que a maioría da información que manexamos e sensible e non se pode comunicar abertamente por teléfono a calquera que a pida e, moito menos, sen un mínimo protocolo e instrucións de seguridade e confirmación de que o usuario de atención telefónica e quen di ser. En todo caso, poderían ser dous sistemas perfectamente compatibles, pois se a consulta non pode ser atendida telefónicamente, no mesmo momento se lle pode facilitar ao cidadán unha cita previa para acudir persoalmente ao xulgado correspondente. No eido dos rexistros civís ainda tería moita máis incidencia (por iso os andaluces o pretenden implantar aí) porque, dunha parte evitarías as colas que se forman en determinados rexistros civis e por outra regulas moito mellor a asistencia de persoas as dependencias xudiciais por mor do Covid-19. En fin, a ver se a algún dos nosos responsables se lle acende a bombilla.
Comentarios
Publicar un comentario