XUNTANZA PRESIDENTE TSXG - SITUACIÓN XULGADOS DE VIOLENCIA DE XÉNERO

O pasado martes, 29  de xuño, mativemos co Presidente do Tribunal Superior de Xustiza de Galiza, José María Gómez y Díaz-Castroverde, a reunión solicitada días atrás, para comentar a situación dos xulgados con competencia en materia de violencia de xénero. 

 

Este sindicato trasladoulle a preocupación pola situación caótica que se vive en moitos destes órganos, o que redunda nun servizo de mala calidade, unha deficiente atención á vítima e unhas condicións de traballo intolerables que se traducen en xornadas maratonianas que impiden a conciliación da vida laboral e familiar. A situación nos xulgados mixtos é ben coñecida: falta de persoal, xuíces/xuízas substitutos/as ou de recente acceso á carreira xudicial que permanecen pouco tempo e que compaxinan a violencia coa materia civil e o resto de penal, instalacións que non permiten a separación de vítima e agresor, etc, etc... A dos exclusivos non é mellor: falta de persoal e unha sistemática de traballo que semella unha garda sen selo, con frecuentes xornadas laborais ate as 19 ou 20 horas. Ante este panorama, este sindicato avoga pola creación de novos xulgados con competencia na materia (habilitando xulgados de reforzo mentres tanto), así como pola “comarcalización”, o que permitiría unha maior especialización e unha descarga de traballo nos órganos mixtos. 

 

En canto á creación dun segundo xulgado na Coruña e Vigo, o Presidente do TSXG afirmou que os datos que reflicten as estatísticas e que se teñen en conta para estudiar a creación de novos xulgados non reflicten a necesidade dun segundo xulgado pero, amosouse preocupado pola situación na que se atopan os existentes e por algunhas cuestións concretas que lle trasladamos, afirmando que este era un tema preferente para el e que tomaba nota do falado, emprazándonos a reunirnos dentro duns meses para comprobar a efectividade dalgunhas das medidas que pensa tomar ao respeto. Esperemos que isto sexa así e que, tanto dende o TSXG como dende a Dirección Xeral se poña remedio á situación insostible destes órganos en todo o país.