O TSXG ESTIMA A DEMANDA DA CIG CONCEDENDO A TRAXECTORIA PROFESIONAL AO PERSOAL INTERINO

Por sentenza do 29 de outubro, da Sala do Contencioso-Administrativo do TSXG, estimouse o recurso interposto pola CIG contra a resolución da Dirección Xeral de Xustiza, de data 30 de xuño de 2020, pola que se fixo público o acordo do Consello da Xunta de Galicia, alcanzado o 10 de xuño entre a Administración da Comunidade Autónoma de Galicia e as organizacións sindicais SPJ-USO, UGT e CCOO para a implantación dun sistema de carreira profesional do persoal ao servizo da Administración de Xustiza, que excluía ao persoal interino.

A Sala do Contencioso-Administrativo do TSXG estima a nosa demanda cos seguintes pronunciamentos:

- Anula as disposicións por nós impugnadas por ser contrarias a dereito.
- Declara, expresamente, o dereito do persoal funcionario interino a participar na traxectoria profesional deseñada pola resolución do 30 de xuño.
- Obriga á Administración a substituír os artigos anulados por outros que fixen o dereito do persoal funcionario interino da Administración de Xustiza de Galicia a participar no sistema de
traxectoria profesional en igualdade de condicións que o persoal funcionario de carreira, así como o seu dereito para acceder aos réximes ordinario e extraordinario de acceso aos distintos graos do sistema.
- Condena á Administración á publicación dos acordos de anulación e substitución no DOG.

Esta sentenza, reforza outras moitas xa ditadas por distintos xulgados do contencioso-administrativo de todo o país, en demandas individuais do persoal interino afiliado á CIG, nas que se condena á Administración a tramitar as súas solicitudes presentadas e que no seu día lles foron denegadas por non ser funcionarios de carreira.
 

Sálvase, con estas sentenzas gañadas pola CIG, a traizón e desprezo ao persoal interino dos
sindicatos “colaboracionistas” asinantes do acordo de implantación da traxectoria profesional que, de xeito intencionado e para contentar á Administración, os excluíron do acordo. 

E despois aínda algún, actuando en contra dos seus propios actos, quíxoo remediar dicíndolles ás compañeiras e compañeiros interinos que recorresen e ofrecéndolles os seus servizos xurídicos (primeiro asino o acordo e exclúote e despois ofrézome a facerche o recurso).

Finalmente, deixar claro que todo isto non afecta en ningún modo ao persoal titular que xa está a cobrar a traxectoria, tal e como o especifica o Tribunal na súa sentenza.

FEITOS....E TAMÉN PALABRAS (as das sentenzas)

Ligazón sentenza:

https://drive.google.com/file/d/1m0VJrJu-x4t_hfkQIB5aLlTVB3h7v1It/view?usp=sharing

Ligazón folla informativa: 

https://drive.google.com/file/d/1A0EUYlUKXBPnMi0rYrWcAI8Ok-rSH6Sc/view?usp=sharing