Este venres, 26 de maio de 2023, celebramos coa Dirección Xeral unha videoconferencia sobre a convocatoria e criterios de repartición do Fondo de Acción Social do ano 2023 da que previamente remitíronnos o borrador da resolución que dará publicidade á referida convocatoria, non tendo prevista aínda a súa publicación no DOG.
Desde a CIG queremos denunciar a pasividade coa que actúa a Dirección Xeral de Xustiza co programa da Acción Social. Ano tras ano é un copia e pega literal. O orzamento para este ano é de 21.911€, mesma cantidade que os últimos 3 anos. Hai que facer referencia ao ano 2019 no que a cantidade do orzamento ascendía a 22.294€, 383€ máis que o orzamento proposto para este ano. Rexeitamos totalmente o borrador da Resolución proposta pola DX, xa que non se axusta a un verdadeiro programa de axudas real e efectivo. Esiximos un incremento do orzamento ao 1% da masa salarial, xa que os salarios nos últimos 3 anos subiron e non se entende como o orzamento continúa a ser exactamente o mesmo.
Por outra banda, solicitamos, como defendemos ata o de agora, que as axudas se establezan en base ao IPREM ou por límite de rendas, en función dos ingresos íntegros anuais e dos membros das unidades familiares, tal como se está a facer no territorio Ministerio.
Na reunión a que acudimos no día de hoxe tamén fixemos mención da recuperación das axudas coas que se contaba fai anos, axudas no transporte, axudas por fillos, para os estudos...No territorio Ministerio seguen a contar con todas estas axudas, nós pola contra fai moitos anos que se nos foron retiradas sen volver recuperalas, polo que hoxe, esixímoslle a DX que se recuperen.
A DX quedou de remitirnos resposta sobre a cuestión dos/as beneficiarios e solicitantes da acción social cando no punto 1.1 di: “ (..) en situación de servizo activo ou de excedencia por coidado de fillos/as e ter destino nesta comunidade autónoma (..)”. Nós manifestamos que concretaran a que se referían con “destino”, á vista das persoas que están en Galiza en comisión de servizos pero con destino definitivo fóra da CCAA, si existía a posiblidade de que estas persoas solicitaran as axudas da acción social.
CONTÍA DAS AXUDAS TENDO EN CONTA O GRAO DE DISCAPACIDADE:
-
Do 33% ao 64%: 300
€
- Do 65% ao 74%: 600 €
- Do 75% en diante: 1.200 €
Estes importes poderanse ver reducidos ou incrementados proporcionalmente a causa do número de instancias presentadas ata que o montante global nos supere os 21.911,00€.
As axudas denegadas en anos anteriores que, como consecuencia de resolución xudicial ou administrativa foran acollidas favorablemente, pagaranse con cargo ao presente Fondo de Acción Social.
A axuda pagarase na conta consignada para o ingreso da nómina.
SOLICITUDES E PRESENTACIÓN:
As persoas solicitantes deberán completar obrigatoriamente o formulario electrónico da solicitude a través da OPAX . O prazo de presentación de solicitudes será de quince (15) días hábiles contados a partir do día seguinte ao da publicación desta convocatoria no Diario Oficial de Galicia.
O prazo máximo para resolver as solicitudes será de 6 meses contados a partir do día seguinte ao de finalización do prazo de presentación destas. Se no prazo establecido non se resolve a solicitude, entenderase rexeitada.
Ligazón folla informativa:
https://drive.google.com/file/d/1iWhdI5Fln8trGz1mDEF1OSmGLqZRmLHM/view?usp=sharing
Comentarios
Publicar un comentario