O Sector de Xustiza da CIG ven de denunciar o estado calamitoso no que se atopa desde fai moito tempo o Xulgado de 1ª Instancia e Instrución Único de Ortigueira. Por unha banda, sofren escaseza de persoal, polo que os expedientes desbordan as mesas. Unha delas estivo totalmente paralizada durante meses por non contar con ninguén nela, sendo conscientes disto na DXX. A carga de traballo é tan elevada neste partido xudicial que se están a incoar agora, no mes de maio, atestados do pasado mes de agosto. Ademais, o auxilio xudicial non pode realizar dilixencias fóra da oficina xa que se encarga de levar o Rexistro Civil da vila, polo que non hai ninguén en Ortigueira para poder notificar as resolucións nos domicilios, quedándolle ao persoal do xulgado como única opción para notificar, cando as cartas veñen de volta, os edictos.....É evidente a clara necesidade de unha persoa máis nesa oficina xudicial, pero a DXX parece facer caso omiso ao escrito presentado no seu momento pola LAX do xulgado para reclamar ese aumento de persoal.
Por outra banda, é un lugar no que xa é habitual que as aplicacións informáticad que utilizan as/os traballadores/as, como Minerva, vaian máis lentas que noutros sitios, pero a gota que rebordou o vaso foi, cando o xoves de semana santa, se encontraba de garda o xulgado cun detido por violencia machista e, tras producirse unha caída da liña de teléfono quedaron na oficina xudicial sen acceder a internet, quedando tamén inutilizada a impresora. Sendo un festivo non tiveron asistencia ningunha por parte da DXX e a impresora acabouna arranxando un familiar do persoal do xulgado. Os autos e demais resolucións tiveron que facelas no programa informático de procesamento de textos xa que era o único co que contaban para poder traballar. Esta situación é gravísima é intolerable. Que en pleno 2023 sucedan cousas como estas nos xulgados, con situacións así, deixan claro que a xustiza en Galiza nin é eficaz nin se lle da celeridade, máis ben todo o contrario. As vilas seguen sendo as grandes esquecidas por parte da DXX e a cidadanía de Ortigueira ten o mesmo dereito a recibir unha xustiza de calidade que no resto de cidades do País.
Ligazón nova CIG:
Ligazón ENFOQUES.GAL:
Ligazón COPE:
Comentarios
Publicar un comentario