NOVOS PERMISOS FAMILIARES EBEP

A XANELA DA XUSTIZA

 MESA SOBRE SUBSTITUCIÓNS E ATRIBUCIÓNS DE FUNCIÓNS

   A Dirección Xeral convocou para hoxe, día 20, unha mesa para, en principio, modificar a orde reguladora das substitucións co obxecto de adaptala á sentenza do TSXG en canto á titulación requirida e os conceptos de retribución. Sen embargo, o día antes sorprendeunos enviando un borrador dunha nova orde na que non só se modifican estes aspectos senón todo o espíritu da norma, intentando eliminar practicamente as substitucións e establecendo un novo sistema de atribucións peor que o existente, que non soluciona os problemas actuais e que resultaba moi lesivo para os dereitos dos traballadores.

Por todo iso, a CIG opúxose á negociación desta nova orde, na que o único aspecto novedoso positivo é o establecemento do procedemento único de petición para substitucións verticais e horizontais. Tamén manifestamos a nosa protesta porque se pretenda modificar unha norma para adaptala a unha sentenza firme e sen embargo se estea a aplicar aleatoriamente o dereito (establecido por outras sentenzas firmes) a solicitar prazas doutras provincias en substitución.

Finalmente, acordouse modificar a orde actual en canto á titulación e retribucións (establecendo unha contía adicional polo incremento da responsabilidade inherente ao novo posto) e deixar para máis adiante a negociación sobre posibles modificacións da orde existente. En canto ás atribucións de funcións, a CIG propón como única vía de solución a creación dun servizo común de auxilio xudicial.

En canto a outros aspectos tratados na mesa:

        1.- Comunícanos a DXX que, a partir do ano que ven, a cobertura dunha praza con persoal interino deberá ser previamente autorizada por Facenda, que estudiará a necesidade e oportunidade da mesma, o que suporá na práctica, non só o retraso nos nomeamentos acordados, senón, con toda seguridade, a falta de cobertura dun gran número de prazas.

        2.- Nun prazo indeterminado ofertaranse a comisión de servizo as prazas creadas na Fiscalía do TSXG na Coruña.

        3.- A finais deste mes suprimirán un reforzo de Corcubión, un do Decanato ubicado no Edificio de Proa e un do Xulgado do Mercantil 1 da Coruña; prorrogarán inicialmente os demais reforzos por un mes. A CIG solicitou o nomeamento dun reforzo no Xulgado de Instrución nº 1 de Lugo dada a especial situación que se está a dar nese órgano.

4.- Ademáis, a CIG solicitou que se nos informe sobre as decisións adoptadas a partir dos informes emitidos polo servizo de inspección médica de baixas.

5.- Como petición final solicitouse que a información existente a través do AIX sobre as bolsas de interinos e as substitucións sexa máis ampla (destinos, datas de posesión, datas de cesamento, etc.).