MESA SECTORIAL SOBRE COMISIÓNS DE SERVIZO E SUBSTITUCIÓNS

Onte, xoves día 24, celebrouse unha Mesa Sectorial para continuar coa nova regulación das comisións de servizo e as substitucións, suspendida dende o ano 2017. Con caracter previo a Administración facilitou ás organizacións sindicais uns borradores  aos que a CIG fixo unha emenda total porque, ao noso entender, contradín o establecido no Regulamento de ingreso.

Somos as primeiras en entender a necesidade de darlle unha nova regulación a esas dúas figuras, sobre todo para facilitar a mobilidade dentro do mesmo corpo, pero é a nosa responsabilidade facelo respectando a normativa estatal e evitar que teñamos que ir modificándoas no futuro a golpe de sentenza, como pasou coa orde de substitucións vixente.

Para a CIG, o Regulamento de ingreso deixa claro que:

1.- só as prazas vacantes poden ser cubertas en comisión de servizo (art. 73.1)

2.- as comisións de servizo están contempladas para cando non se poda cubrir a praza por medios ordinarios ou extraordinarios de provisión ( art. 73.3), polo que parece establecer unha prevalencia das substitucións sobre as comisións.

Tendo isto en conta, solicitamos que remitan os borradores ao departamento xurídico para que emita informe sobre estas cuestións e se acheguen uns textos dunha legalidade menos cuestionable que os actuais.

Ademais, a CIG presentará alegacións por escrito acerca doutras cuestións:

-          Dado que o regulamento contempla que as substitucións cesarán cando se incorpore o titular ou cese a causa que a motivou, entendemos que non se pode establecer o cesamento por falta de desempeño efectivo superior aos 15 días.

-          A regulación das circunstancias especiais agora contemplada na regulamentación das comisións debe saír de aí e prantexarse doutro xeito, sempre no ámbito do Comité de Seguridade e Saúde. Asimesmo, debe incluirse o acoso sexual e a conciliación do persoal destinado fora de Galiza con fillos e fillas menores de idade residentes no noso país.

-          Distinta regulación para as atribucións de funcións do corpo de auxilio, contemplando o pagamento de todas as efectuadas.

Creación de novas prazas: con respecto a este particular a DX anunciou que se ofertarán as 28 prazas novas a comisión de servizos

Pagamento do cuarto punto á Secretaría dos Xulgados de Paz: a DX comunica que Facenda establece a necesidade de modificar o CAT para contemplar o pagamento dun punto que ven encadrado dentro do Complemento Xeral do Posto, polo que a CIG  manifestou as súas dúbidas ao respecto e solicitou que se nos remita o informe de Facenda para o seu estudo pola nosa asesoría xurídica.