Una vez máis, a CIG tivo que acudir aos tribunais, en defensa da prestación correcta dun servizo público e das traballadoras/es da Administración de Xustiza de Galiza, ante o atropelo levado a cabo pola Dirección Xeral de Xustiza nas repetidas seleccións do persoal interino efectuadas a través do SPEG. Na sentenza acadada o xuiz non da crédito a inobservancia da norma realizada pola administración neste tipo de selección onde, os respectivos servizos de xustiza, executando as ordes da Dirección Xeral, realizaban unha selección totalmente anómala a través do servizo público de emprego, que se saltaba todos os requisitos establecidos na Orde do 4 de outubro de 2018. A administración permitía que persoas con méritos so en auxilio puideran optar a prazas de tramitación e xestión, e viceversa. Así mesmo, esixía o cumprimento dos requisitos de servizos prestados e exames aprobados, cando realmente aos compoñentes da bolsa só se lles esixía un deses requisitos. Todas estas tropelías foron denunciadas pola CIG, posto que se lles estaba a outorgar méritos futuros a persoas que non reunían os requisitos establecidos na lei para poder obtelos. Deste xeito, agora haberá persoal interino con méritos por tempo traballado, que poderá facer valer nos vindeiros procesos selectivos de concurso-oposición, que non deberían ter, xa que non cumprían os requisitos fixados para desempeñar eses postos de traballo e, pola contra, si haberá persoal cualificado que nunca puido obter ditos méritos. Deste xeito a administración, en cada proceso de selección, escollía a unha minoría de persoal, no canto de escoller a todas/os o candidatos/as posibles que cumpriran con requisitos de cada corpo e, non contenta con iso, permitía e facía valer méritos obtidos nun corpo para o acceso a outro corpo diferente. Esta actuación da adminitración costoulle a estimación total da nosa demanda e a imposición de 500 € euros en custas.
Ligazón sentenza:
https://drive.google.com/file/d/1TCH2XhH6pybvbjYk8dGPfYpyZYRQg-my/view?usp=sharing
Comentarios
Publicar un comentario