MOBILIZACIÓN CONTRA A FALTA DE SEGURIDADE NOS EDIFICIOS XUDICIAIS

A Federación de Servizos da CIG, co apoio do Sector de Xustiza da Federación de Administración Pública, desenvolverá unha mobilización diante da Cidade da Xustiza de Vigo, o vindeiro luns 18 de setembro, para rexeitar o novo concurso de adxudicación do servizo de vixilancia e seguridade nos edificios xudiciais de Galiza. Dende a central levan tempo denunciando que os pregos de condicións non contemplan unha dotación económica suficiente para cubrir os gastos salariais do persoal que vai ser subrogado e que o concurso non dá resposta ás necesidades de vixilancia e seguridade das instalacións.

O responsábel nacional de seguridade privada da CIG, lembra que o proceso estivo cheo de deficiencias dende o principio, até o punto de que a Xunta tivo que desistir do anterior concurso tras as alegacións presentadas pola central sindical reclamando que se corrixisen as anomalías detectadas nos lotes 1 (edificios xudiciais da Coruña) e 12 (Cidade da Xustiza e rexistro civil de Vigo), ademais de non incluirse o edificio de Lalín.

A concentración terá lugar o luns 18 de setembro, as 11:00 horas, na praza da Cidade da Xustiza.

Ligazón:

https://www.cig.gal/nova/a-cig-convoca-unha-protesta-diante-da-cidade-da-xustiza-de-vigo-para-rexeitar-o-novo-concurso-de-seguridade-privada.html