Na tarde do luns, trala petición unánime das OOSS e, despois de días de ocultismo e silencio, o Ministerio informou da proposta de acordo trasladada ás asociacións de LLAX o pasado venres. Ante o contido da mesma, a CIG quere manifestar o seguinte:
PRIMEIRO.- Que os únicos representantes legais do corpo de LLAX con capacidade negociadora son as organizacións sindicais e que non será legal ningún acordo que non sexa previamente aprobado na mesa sectorial na que están representados CIG, ELA, CCOO, UXT, STAJ e CSIF.
SEGUNDO.- Que froito desa representación, en virtude dun acordo asinado pola CIG en 2021, o complemento específico dese corpo incrementouse en 195 euros.
TERCEIRO.- Que a implantación dos Tribunais de Instancia pola nova Lei de Eficiencia Organizativa (de chegar a aprobarse) suporá un esforzo para todo o persoal da Administración de Xustiza, podendo modificar sustancialmente as condicións de traballo en moitísimos casos. De feito xa se convocaron varias concentracións en meses pasados contra o texto do anteproxecto.
É por iso polo que rexeitamos unha suba unicamente para un dos corpos implicados nesa implantación alegando unha suposta “centralidade transversal”. De feito, o proxecto de LOEO, con respecto aos arts. 440 a 469 bis correspondentes ao Título II do Libro V, que é onde se regula o corpo de Letrados/as, só contempla unha leve modificación dos arts. 464 e 466 sobre a elección de Secretarios/as de Goberno e Coordinadores. Sen embargo, do Libro VI, sobre o resto de corpos da Administración de Xustiza, hai propostas de modificación das funcións, dos centros de destino, a ubicación dos postos, etc....
CUARTO.- Denunciamos a ilegalidade da constitución de grupos de traballo sobre cuestións claramente obxecto de negociación colectiva. As partes queren con este acordo vulnerar o establecido no art. 444.2 que establece como dereito profesional do corpo “que as asociacións profesionais sexan oídas en todas aquelas materias que afecten ao seu estatuto orgánico”. Que sexan oídas non significa, por suposto, que se negocie con elas, e menos cando, como dixemos, a LOEO non muda o seu estatuto orgánico contemplado no Cap I do Título II do Libro V. De producirse tal negociación, a CIG acudirá aos tribunais, que xa sentenciaron no seu día a nulidade dunha norma sobre substitucións de LLAX por falta de negociación colectiva, ademais de propor e apoiar medidas de forza en contra de tal situación.
Ligazón folla informativa:
https://drive.google.com/file/d/1i_p5rUkkX_5zlhV72IPfBp6o9jkysOU3/view?usp=drivesdk
Comentarios
Publicar un comentario