Hoxe tivo lugar unha xuntanza co Ministerio de Xustiza, como ven sendo habitual de xeito telemático, no que dito departamento ministerial nos trasladou os eixos fundamentais nos que pretende asentar a regulamentación sobre teletraballo na Administración de Xustiza.
Nesta primeira xuntanza de contacto co Ministerio sobre este tema, desde a CIG trasladámoslles as seguintes cuestións:
1) A apreciación da deficiente regulación legal a través do artigo 47bis do EBEP (na lexislación xeral hai 22 artigos no RDL 28/2020 para regular o teletraballo e os traballadores públicos temos un único artigo no EBEP), que non recolle no corpo do seu articulado, segundo o noso punto de vista, suficientes garantías para as traballadoras e traballadores que vaian realizar teletraballo na administración, o que xa produciu que a CIG non asinara no seu día o acordo sindical sobre a modificación de dito artigo.
2) Trasladámoslle igualmente a administración que, con esta pretendida negociación, se estaba a facer a casa polo tellado, posto que a día de hoxe non temos ningún programa de xestión e interconexión entre todos os órganos xudiciais de España e ademais non só existen unhas bases de datos totalmente corrompidas, se non unha implantación moi deficitaria e dispar do expediente xudicial electrónico, como para poñernos agora a implementar o teletraballo. A CIG non se opón a que se faga unha regulamentación do teletraballo pero si é consciente dos outros problemas máis graves que acucian a Administración de Xustiza no eido tecnolóxico e que, a día de hoxe, non están resoltos e, se non os resolvemos, o teletraballo será un problema máis a engadir aos existentes.
3) No que a negociación da regulamentación do teletraballo se refire puxemos tamén en dúbida que este mesmo proxecto igual tamén está a ser estudado no eido do Ministerio de Administracións Públicas e debería de terse en conta iso para as engádeas que puideran ser aportadas a este proxecto de regulamentación.
4) Incidimos, como o resto de centrais sindicais, en que os LAX non poden ser os que teñan a facultade de decidir que traballadoras/es poden facer teletraballo ou non nun órgano xudicial, porque o LAX así o considere oportuno. Unha cuestión e que os LAX emitan un informe sobre a conveniencia ou oportunidade da realización do teletraballo e outra moi diferente e quen ten finalmente a decisión administrativa sobre a concesión de dita petición. Desde o Ministerio estase a traballar nunha aplicación informática para recoller tanto a petición das interesadas/os como os posibles informes dos LAX para logo adoptar eles a decisión correspondente.
5) Finalmente, fixemos moito fincapé en que había que facer un grandísimo esforzo inversor no eido da formación nestas novas tecnoloxías e formas de traballar. De nada serve ter aplicacións informáticas e ter a posibilidade de teletraballar, se ao final non somos quen de sacar o 100% do rendemento a todas estas ferramentas informáticas por descoñecemento do uso das mesmas.
6) Como un apuntamento máis, no territorio de competencia ministerial, neste momento, están a teletraballar 3022 traballadoras/es (nalgúns casos con equipos facilitados polo propio Ministerio). De aquí a final de ano teñen xa adxudicada a compra de entre 3000-4000 equipos portátiles para desempeñar o teletraballo e mentres aquí en Galiza, a preguntas de CIG no comité de seguridade e saúde laboral, a Dirección Xeral de Xustiza nin sabe nin contesta sobre a petición ao AMTEGA de previsión e adquisición de portátiles para realizar teletraballo na Administración de Xustiza en Galiza.
Comentarios
Publicar un comentario