DESINFORMACIÓNS MALINTENCIONADAS TRAS AS IRREGULARIDADES DETECTADAS NO VOTO POR CORREO EN PONTEVEDRA
A CIG, ante as desinformacións malintencionadas que unha central sindical está a verquir sobre a análise realizada na mesa coordinadora das eleccións sindicais de xustiza de Pontevedra, de determinadas solicitudes de voto por correo presentadas, expoñemos:
1) A mesa coordinadora e plenamente competente para analizar as peticións de voto por correo e decidir cales están correctamente presentadas e cales non.
2) Todas as centrais sindicais presentes nas xuntanzas coa mesa coordinadora poden analizar as peticións de voto por correo emitidas, por se tivera que formularse algunha reclamación ao respecto. Segundo a lei hai 24 horas para formular alegacións. En ningún caso se analizaron os requisitos da emisión do voto (cuestión imposible de realizar neste momento, posto que dita comprobación faise o día da votación) o que se analizou foi o cumprimento dos requisitos contemplados na lei para a petición do voto por correo realizada.
3) Os nomes de todas as/os solcitantes de peticións de voto por correo figuran nas actas correspondentes, tras verificar a mesa que cumpren os requisitos da súa presentación e a comprobación da listaxe de electores correspondente.
4) A CIG ceñiuse a seguir o procedemento legalmente establecido e presentou a súa reclamación cos indicios que atopou na análise de 46 peticións de voto por correo, correlativas, emitidas a través da mesma oficina de correos. A mesa decidiu, por unanimidade dos seus tres membros, anular esas 46 peticions e que, no seu caso, se voltaran a presentar de xeito correcto.
5) En ningún momento a CIG recabou e publicou ningún dato persoal das/os solicitantes de voto por correo. De feito, no escrito que obra neste mesmo blog (02/06/2026) xa non se incluiu a listaxe anexa onde se relacionaban os nomes das/os solicitantes e que soamente foron remitidos á mesa coordinadora na reclamación presentada, para fundamentar dita reclamación.
6) En todo caso unha central sindical recoñeceu na propia mesa coordinadora ser a que remitiu esas peticións de voto por correo, que foron anuldadas en base as sospeitas de que non se tiveran feito de acordo cos requisitos previstos no artigo 19 do RD 1846/1994, de 9 de setembro.
A CIG coa súa reclamación só perseguiu a limpeza do proceso electoral e que as centrais sindicais que nos presentamos a estas eleccións teñamos a seguridade de que todos cumprimos coas normas que existen no ordenamento xurídico para o desenvolvemento destes procesos.
Ligazón artigo 19 RD 1846/1994:
https://drive.google.com/file/d/1BBhpdacltglmzksG-ZLhzM4RVcBUrHec/view?usp=sharing
Comentarios
Publicar un comentario