Alá por finais do ano 2021 había quen prometía que o 2º grao da traxectoria profesional sería convocado en febreiro de 2022. Posteriormente, en xuño de 2022, eses mesmos mesías “garantizaban”, sen ningún pudor, que en setembro de 2022 sería publicada a convocatoria extraordinaria para a consolidación do 2º grao da traxectoria profesional. E neste momento xa nos atopamos en outubro de 2022 e da consolidación do Grao 2º non se sabe nada, como tampouco da convocatoria ordinaria para o acceso ao grao inicial daquelas compañeiras/os que se incorporaron á comunidade autónoma nos últimos concursos de traslados. Debe de ser que a máis de un se lle acabaron os feitos e, igual tamén as palabras, para poder explicar o que estaba claro que a Dirección Xeral de Xustiza ia facer seguindo as instrucións da Dirección Xeral de Función Pública, e que xa a CIG adiantou en informacións anteriores.
Por todo iso a CIG, fai meses, presentou a través das súas delegadas/os reclamación administrativa polo incumprimento do acordo da traxectoria profesional e, concretamente, contra a falta de convocatoria do grao 2º, pendente neste mes de outubro da máis que segura interposición do correspondente recurso contencioso-administrativo.
Unha vez máis, a CIG, en defensa dos intereses de todas as traballadoras/es da Administración de Xustiza de Galiza vai ter que prantexar medidas xudiciais para a reclamación do que a administración autonómica asinou e non está a cumprir neste momento, co beneplácito e a displicencia dos mansos que asinaron aquel acordo e non recorren o seu incumprimento.
Ligazón folla informativa:
https://drive.google.com/file/d/1XHAcXFiz5cqUsIhwIkCFlrpdanh08oft/view?usp=sharing
Comentarios
Publicar un comentario